Փաշինյանի հերթական մեգասուտը պայթեց. տեսախցիկները Սաշիկինը չէին

«Այս դահլիճում գտնվողների 99 տոկոսը, չեմ ուզում ասեմ՝ 100 տոկոսը, որպեսզի դահլիճում գտնվող ներկաների համար մեկ տոկոս ալիբի ապահովեմ, 99,9 տոկոսը համոզված է, որ արագաչափերի ընկերության հետևում կանգնած է Սերժ Սարգսյանի եղբայր Ալեքսանդր Սարգսյանը: Ասում եք` ո՞ւր ա գնում գումարները, ո՞ւր ա գնում, Սերժ Սարգսյանի ընտանիքին է գնում: Նախկինում հանրային գիտակցության մեջ Սերժ Սարգսյանի եղբայրը ընկալվում էր՝ որպես սրա-նրա բիզնեսների մեջ փայ մտնող, հիմա ինքը փաստացի յուրաքանչյուր վարորդի ընտանեկան բյուջեի մեջ փայ ա մտնում….»։

Այս խոսքերը ՀՀ ներկայիս վարչապետ Նիկոլ Փաշինյանն արտաբերել է 2014թ. մարտի 24-ին Ազգային ժողովում, երբ դեռ ԱԺ ՀԱԿ խմբակցության ընդդիմադիր պատգամավոր էր, և կրկնել է իր պատգամավորության հետագա բոլոր տարիներին, ԱԺ «Ելք» խմբակցության ղեկավար եղած ժամանակ, Գյումրիից Երևան քայլելիս՝ զուգահեռաբար կպչուն թերթիկներով և հնարավոր ամեն ինչով փակելով արագաչափերը, ինչպես նաև, երբ ընդդիմադիր շարժման առաջնորդ էր ու մարդկանց նաև այդ տարբերակով էր փողոց դուրս բերում։ 

«Նամակ ստացա այսօր, նրաբեղ թիթեռի քաշի, բացեցի. սիրածս չէր. վճարիր 5000, Սաշիկ։ Սերդեչնի պրիվետ ատ Հարութինա Զիմզիմովա»,- Գյումրիից Երևան քայլերթի ժամանակ արտասանում էր Նիկոլ Փաշինյանը և ճանապարհին պատահած արագաչափերի վրա փակցնում կպչուն թերթիկներ…

Ինչ խոսք, որպես քաղտեխնոլոգիա՝ կատարյալ տարբերակ էր ընտրված՝ մարդկանց կեղծ տեղեկատվություն հրամցնելով՝ կրքերը բորբոքելու և փողոց հանելու համար, սակայն իշխանության գալով՝ ակնհայտ դարձավ, որ վարչապետ Նիկոլ Փաշինյանն առհասարակ ցանկություն չունի տեր կանգնել իր իսկ խոսքերին ու վերացնել արագաչափերն ու հատկապես կարմիր գծերը։ 

Ժողովրդի գիտակից, դատող հատվածին մնում էր միայն կռահել, թե ո՞վ է «մեր օրերի Սաշիկը», և ո՞ւմ գրպանում են հանգրվանում ներկայիս տույժ-տուգանքները։
Ընտրողների համար, քանի որ դեռ ԱԺ արտահերթ ընտրություններ կային առջևում, հայտարարվեց տուգանքների համաներում, մարդիկ ուրախացան, որ «ջրվեցին» կուտակված տուգանքները, իսկ պարտաճանաչ մուծող զանգվածը մնաց ձեռնունայն։
Թե ինչ ճանապարհատրանսպորտային վիճակագրություն ունենք մենք հիմա այժմ, այնքան էլ կարևոր չէ, քանի որ յուրաքանչյուրս էլ ամեն օր մեր ճանապարհներին տեսնում ու զգում

ենք այդ համաներման ողջ «փայլը»։ 

Բայց սա դեռ ամենը չէ։

«Սաշիկ Սարգսյանը արագաչափերի բիզնես չի ունեցել». ԱԺ «Իմ քայլը» դաշինքի պատգամավոր

«– Պարոն Խաչատրյան, նախկին ընդդիմությունը հայտարարում էր, որ արագաչափերի բիզնեսը պատկանում է Ալեքսանդր (Սաշիկ) Սարգսյանին: Դա ճի՞շտ էր:

– Ամբողջ տեսախցիկների համակարգը՝ գույքով, տեխնիկական միջոցներով, պետության սեփականությունն է շատ վաղուց, դեռևս 2013 թվականից: Որպես ծառայության մատուցում՝ դա հանձնարարվել է «Սեքյուրիթի դրիմ» կազմակերպությանը և որևէ մեկի սեփականությունը չէ: Այդ ամբողջ գույքը պատկանում է պետությանը, և այդ գործառույթը իրականացվում է պետության կողմից: Սա ոչ մեկի բիզնեսը չէ:

– Այսինքն, հերքո՞ւմ եք հայտարարությունները, թե Ալեքսանդր Սարգսյանն առնչություն ունի այդ ամենին:

– Այո»։

Վերոբերյալը մի հատված էր Նիկոլ Փաշինյանի «Քաղաքացիական պայմանագիր» կուսակցության «Իմ քայլը» դաշինքով պատգամավոր դարձած, Ճանապարհային ոստիկանության պետի նախկին տեղակալ Արմեն Խաչատրյանի երեկվա հարցազրույցից։

Փաստորեն՝ Փաշինյանի կուսակցության պատգամավոր նախկին պաշտոնյան հայտարարում է՝ ՀՀ երրորդ նախագահ Սերժ Սարգսյանի եղբայրը՝ Ալեքսանդր (Սաշիկ) Սարգսյանը, արագաչափերի բիզնես չի ունեցել: 

Մեկնաբանելու բան չկա. պարզապես արձանագրենք, որ ՀՀ շարքային քաղաքացի, լրագրող, խմբագիր, պատգամավոր, խմբակցության ղեկավար, ընդդիմադիր շարժման առաջնորդ, իսկ այսօր արդեն՝ ՀՀ վարչապետ Նիկոլ Փաշինյանը տարիներ շարունակ խաբել է իր ընտրողին, ՀՀ շարքային քաղաքացուն, ապա նրան սին խոստումներ տվել ու կրկին խաբել։

Մանիպուլյացիան աշխատել է լիովին, բայց ՀՀ շարքային ընտրողը խնդիր ունի՝ հասկանալու, որ ինքն ընդամենը գործիք է եղել Նիկոլ Փաշինյանին վարչապետ դարձնելու համար։

ԱՐՄԱՆ ԳՐԻԳՈՐՅԱՆ

168.am

Like this post? Please share to your friends:
DIVERTISSEMENT GARANTI